Birakwiye ko abafite ubumuga bakurirwaho inzitizi mu kubona amakuru no gusenga

Abakurikiranira hafi ubuzima n’imibereho by’abafite ubumuga mu Rwanda, bagaragaza ko nubwo hari byinshi byakozwe mu kubaha no kubahiriza uburenganzira bwabo, hari ibyo bagihezwaho birimo kubona amakuru no gusenga.

Abafite ubumuga bishimira ko hari ibyakozwe nko gushyira inzira n’ubwiherero bibafasha mu nyubako ndende, kubafasha kubona utugare, insimburangingo n’inyunganirangingo, kubashyiriraho itegeko ribarengera n’ibindi.

Ubuyobozi bw’ Inama y’Igihugu y’Abafite Ubumuga (NCPD) bufatanyije n’Itorero ry’Angilikani Diyosezi ya Gahini n’umuryango ubafasha (CBM) babwiye itangazamakuru kuri uyu 2 Mata 2019 ko abafite ubumuga bacyugarijwe n’ibibazo.

Wadusanga Karumuna, urenze umugezi w'Akagera werekeza Nyamata. Ikaze

Ni ikiganiro cyagarutse ku bijyanye no kubona amakuru atangazwa n’ibinyamakuru, kugera aho basengera cyangwa kumva ibihavugirwa na gahunda yo gutaha ikigo gishya kizajya gikorera insimburangingo i Gahini, izaba ku wa 18 uku kwezi.

Umuyobozi w’ishami ryo kubaka ubushobozi bw’abafite ubumuga muri NCPD, Tuyizere Oswald, yavuze ko ‘Hari bamwe batabasha kumenya amakuru, abayamenya igice n’abandi bayabwirwa kandi muzi ko inkuru mbarirano ituba’.

Ati “Hari zimwe mu nzitizi abafite ubumuga bakunda guhura nazo mu kubona amakuru, cyane cyane ajyanye n’insimburangingo n’inyunganirangingo n’andi bityo ugasanga baheze mu nzu.”

Tuyizere yavuze ko hari ubwo usanga itangazamakuru ryandika, iry’amajwi n’iry’amashusho ridateganya uburyo bwo kugeza amakuru ku bafite ubumuga bwo kutareba no kutumva, ngo rikoreshe inyandiko zabagenewe n’abasemura ururimi rw’amarenga.

Ati “Icyo dusaba ni uko[abafite ibinyamakuru] mwashyirahouburyo bufasha wa muntu utabona kumva amakuru mutangaza [Ku binyamakuru byandika] n’ubufasha utumva kureba amakuru [Kuri Televiziyo], mushyiraho abantu bayasemura.”

Kugeza uyu munsi, Televisiyo y’u Rwanda niyo gusa igira usemura mu rurimi ry’amarenga ariko nayo ngo ibikora mu makuru y’ikinyarwanda, NCPD ikaba yifuza ko n’izindi televiziyo zamugira kandi akora mu biganiro n’amakuru byose ndetse n’ibinyamakuru byandika bigateganya inyandiko abafite ubumuga bwo kutabona bakwifashisha.

Umuyobozi wa Diyoseze ya Gahini mu itorero Angilikani, Musenyeri Birindabagabo Alexis, yavuze ko hari amatorero n’amadini amwe aheza abafite ubumuga, ugasanga kwinjira mu rusengero cyangwa kugera aho basomera ijambo ry’Imana birabagora.

Ati “Ibyinshi si uko hari ubushake buke ahubwo usanga ari ukutabimenya. Abafite ubumuga bafite uburenganzira bwo kwinjira muri Kiliziya cyangwa mu rusengero ariko hari igihe usanga mu gihe cyo kubaka bidatekerezwaho, ugasanga hari nk’amadaragi, ugasanga ufite ubumuga ntabashije kwinjira, ukaba umuheje utababishaka.”

Yakomeje agira ati “Ikindi tukirwana nacyo ni icyo kugira ngo haboneke abasemura mu gihe cyo gusenga. Ni ibintu dukwiye kuzirikana [..]Kimwe numva abanyamadini dukwiye gukora, ni uko abafite ubumuga bakwiye kuza bakumva ko ari mu muryango kandi bakunzwe.”

NCPD ivuga ko abafite ubumuga baba bakwiye no guhabwa uburenganzira bagakora amatsinda y’abaririmbyi mu nsengero kuko nabo babishoboye kandi baba babyifuza.

Umuyobozi wa CBM mu Rwanda, Mukantagwera Eugénie, yavuze ko ‘Ikigo gikora insimburangingo n’inyunganirangiro kikanafasha abafite ubumuga bateye inkunga, cyuzuye gitwaye miliyari 1,5Frw utabariyemo ibikoresho bizagishirwamo.

Kizaba gifite ubushobozi bwo kwita ku bafite ubumuga no kwakira abivuza bacumbitse basaga 50.

Mu Rwanda habarurwa abafite ubumuga barenga ibihumbi 446 hatabariwemo abari munsi y’imyaka itanu.

B.Thomas

 

Leave a Reply